പടവുകളിലെ പ്രണയം 

ഒരു വട്ടം കൂടി ഞങ്ങൾ വരും,

കൈകൾ ചേർത്തു  പിടിച്ച് , ഇണ ചേർന്ന് .

ഒരുപാടു കയ്‌പും മധുരവും പേറിയ 

ഓർമകളുടെ ആ കോണിപ്പടികളിൽ !

വിടാതെ എന്നെ ചേർത്ത് പിടിച്ച നിമിഷങ്ങൾ,

ചുണ്ടുകളും കരങ്ങളും ആലിംഗന മാധുര്യം 

നുകർന്ന വേളകൾ, നിൻ ഗന്ധം 

നിറഞ്ഞു നിന്നു ആ ചുമരുകൾക്കിടയിൽ !

കോണിപ്പടികൾ വീണ്ടും കയറി നാം ,

നീ തീർത്ത കരവലയത്തിൽ ഒരു -

പിഞ്ചു കുഞ്ഞിനെപ്പോലെ ,പാൽ ഗന്ധം പേറി,

അറിഞ്ഞു നിന്നിലെ ആ മാതൃ സ്പർശം !

ഉന്നതിയിലെ ജാലകങ്ങളെ ഭയന്നു നാം.

ജാലകക്കണ്ണുകൾ വെട്ടിച്ച് ,

പടവുകളിൽ പാദങ്ങൾ തൊട്ടിയുരുമ്മി ,

കണ്ണുകൾ പരസ്പരം നെയ്തെടുത്തു ,

പ്രണയമെന്ന സത്യം !

ഇന്നു നാം വീണ്ടും അതേ പടവുകളിൽ.

നന്ദി ചൊല്ലേണ്ടു നാം ,

വെറുത്തു പോയ ജാലകങ്ങളോട് ,

വസന്തകാലങ്ങൾക്കു സധൈര്യം 

മറ തീർത്ത വെണ്മതിലിനോടു !

അതിലുമുപരി നമ്മെ നയിച്ച 

പടവുകളോട് ! സാക്ഷിയായ്, 

നീ ഈ രാധാ - മാധവ സംഗമങ്ങൾക്ക് .

സ്മരിച്ചിടുന്നു ആ കൽപ്പടവുകളെ ,

പുതു നാമ്പുകൾ മുളക്കട്ടെ,

നിൻ വഴികളിൽ !

--- കൃഷ്ണരാജ് എം (15/05/2018)